ఈ పండగలోని కృతక ’లవ్’ని కాక లలితమైన ’లబ్-డబ్’ని చూపించింది.

గ్లోబలైజేషన్ పుణ్యమా అని "వలంటైన్స్ డే" అనొక "దినాన్ని" దిగుమతి చేసుకుని ’సద్వినియోగం’చేసుకోవడం ఓ దశాబ్దంగా నడుస్తోందనిపిస్తుంది.  కోలవెర్రి లా దిగుమతి చేస్కున్న ప్రతిదీ వాణిజ్యమార్గపు బాట పట్టడంలో మన మార్కెట్టు మహా దిట్ట! ఓ పక్క అబ్బబ్బా!ఇద్దూ...అనే అబ్బాయిలతో-ఉండవద్దా హద్దూ పొద్దూ అనే ముద్దుగుమ్మలతోనూ వలపు వనాలలో కిలకిల రవాలు పరాకాష్టకు చేరగా- తాళి కట్టు శుభవేళా....అంటూ భాజాపాయంగార్లు పెళ్ళి బాజాల గోలలతో సదరు కుర్రకారు విలవిలలాడేలా చేయగా.... రకరకాల భావావేశాలకు లోనైన ఈ ’డే’ కాంసెప్టు అనేకానేక స్టెప్పులు దాటి...అదేదో అనిర్వచనీయ పదార్ధంగానూ-పండగ చేసుకోవాలో వద్దో తెలియని ’జడ’ పదార్ధంగానూ-చాందసులకే హృదికే అందని మందారంగానూ-చివరాఖరికి అందరి దరికీ చేరిన సుందర పదార్ధంగానూ కాల-చంక్రమణమ్ చేసిన ఈ "వలంటైన్స్ డే" ఇప్పుడు ’ఫర్లేదు...చేసుకోవచ్చు’అని సభ్యసమాజపు చేతులుచాపిన స్వాగత బాహువుల్లోకి చేరింది. పండగలో పస ఎంత ఉన్నా.... పైసలుచేస్కునే మార్కెట్టూ-పైట తొలగితే చెలరేగిపోయే రాకెట్టూ సుసంస్కారాల్ని ఎక్కడో గండి కొట్టేస్తున్నాయి! ఇంకెక్కడో డొల్లతనం కనిపిస్తోంది. ఇలా  ఆలోచనలు సాగుతున్న నా మస్తిష్కాన్ని నిన్నటి ’ఈనాడు’  సంపాదకీయం ప్రేమమయం చేసింది. పండగలో ఎండుతనాన్ని కాక బ్రహ్మాండాన్ని చూపించింది. ఈ పండగలోని కృతక ’లవ్’ని కాక లలితమైన ’లబ్-డబ్’ని చూపించింది. అది ఇదిగో!(ఈనాడు సౌజన్యం తో)

పిత్రుదేవోభవ

పాట్రియార్కల్ భావజాలమ్ లాటి పదాలు వదిలేస్తే....ఫాదర్స్ డే కూడా ఇప్పుడు సమాజంలో బాగా పండుతోంది. పిత్రుదేవోభవ-కాన్సెప్ట్ పురాణేతిహాసాల్నించీ ఉంది. అదలా ఉంచి ’నాన్న’ని స్మరించుకునే అవకాశం వచ్చింది గాబట్టి- నాన్న కవితాసంకలనం కొని చదవదగ్గదని ఇలా ముఖపత్రాన్ని               చూపిస్తున్నా....                    

 అందులోనే..... పరమపదించిన వర్చూ ’నాన్న’ని  తన  కవితలో చూడచ్చు.

                                                                 

'ఖరము' కాదా 'శ్రీకరము' ?

ఉగాది అంటే
ఎందుకో నాకు
వ్యక్తిత్వ వికాస గ్రంధంలో
తొట్టతొలి అధ్యాయంలా
హృద్యంగా అనిపిస్తుంది!
ఎందుకంటే అది-
ఎండిన గుండెల మోళ్ళు
మళ్ళీ తడి చిగుళ్ళు
పెడతాయని చెప్తుంది!!
బ్రద్దలైన అనుబంధాల బీళ్ళు
సారవంతమైన లోగిళ్ళవుతాయని
తెలుపుతుంది!!!
కొన్నాళ్ళపాటు తాళాలు వేస్కున్న
ఎల కోయిల గళాలు-
మళ్ళీ యుగళ గీతాలై గుబాళిస్తాయని
చాటుతుంది!
శిశిరంతో సమరం
వసంతంతో సరసం
కోసమేనని తేట పరుస్తుంది!!
షడ్రుచులతో జీవనం
షడ్రసోపేత భోజనమే అంటుంది!!!
కోకిల ఉత్తేజ గీతాలు విన్న పశుర్వేత్తి'
'ఖరము'  సైతము
కాదా  'శ్రీకరము'  అంటుంది!

నేడు పాటల తోట-పుస్తకావిష్కరణ

శ్రీ వయ్యా సామేల్ గారి 'పాటల తోట ' పుస్తకావిష్కరణం కుత్బుల్లాపుర్ లోని నాగార్జున హై స్కూల్ లో ఉ.11-00 గం.కు జరగనుంది. శ్రీ సామేల్ గత పది సం.గా సిటీ అరసం సభ్యుడు గా ఉన్నారు. ఇప్పటికే పదిహేను కవితా సంపుటులను వెలికి తెచ్చారు. పేద ప్రజల పక్షపాతిగా సామజిక కార్యకర్తగా ఆయన తన పుస్తక రచన చేయటం అంతా తెలిసిందే. పెద్దగా చదువుకోలేదు గానీ సమాజాన్ని బాగా చదివారు. ఎటూ ప్రీ లాంసింగ్ గాబట్టి దేనికీ వెరవాల్సిన పనిలేక సమాజంలోని కుళ్ళుని తన కలంతో బలంగా కుళ్ళబొడిచారనేది కొన్ని పుస్తకాలు చదివిన నాకు కూడా అర్ధమయింది. దాదాపు ఆయన అన్ని పుస్తకాలకీ ముఖపత్రం వేసిన వర్చూ దీనికి కూడా  పై విధంగా ముఖపత్రం సామేల్ కి గీసిచ్చారు. ఇంటిల్లిపాదీ జ్వరాలు కాబట్టి పిలుపు వచ్చినా హాజరవలేక పోతున్నాం. ఆల్ ది బెస్ట్ సామేల్జీ!!!

గుర్తుకొస్తున్నాయి.........